HOMENAXE AO CARRABOUXO

A pasada fin de semana, entregáronse no Gran Hotel d'A Toxa os premios Galicia Comunicación. Xosé Lois González, como creador do Carrabouxo, foi galardoado co premio Galicia Comunicación na categoría de mellor labor de comunicación de xornalismo gráfico en medios impresos . O xurado salientou que creara 'un personaxe próximo co que a xente se identifica'.

Xosé Lois González recibiu a noticia do galardón 'moi contento de que consideren ó Carrabouxo na comunicación e non só no aspecto humorístico. Non vou dicir que é inmerecido porque sería unha modestia innecesaria e penso que 'O Carrabouxo' si que o merece'.

¿QUEN É 'O CARRABOUXO'?

O Carrabouxo é un paisano sabio, extremadamente alto, coa boina tapándolle os ollos e o cigarro sempre nos beizos. O personaxe en si é retranqueiro, ás veces retórico e ás veces ten rexouba. O Carrabouxo recolle todas esas especificidades do humor galego. A súa función é facer rir á xente, pero a cabalo da risa vai unha idea, unha crítica social.

Seu humor combina a observación da realidade social do momento cunha abstracción que a afasta do evento concreto. O humor de ambos os dous Carrabouxos conecta co dos seus lectores porque xorde do mesmo extracto social do que todos proveñen. O personaxe, cunha orixe claramente rural como a do seu autor, creouse para transmitir humor e, ademais, conciencia social e ideoloxía.

¿QUEN É XOSÉ LOIS?

Xosé Lois González Vázquez, O Carrabouxo (Ourense, 1949) é titulado en Enxeñería Técnica de Telecomunicacións, traballa para o Ministerio de Industria, Turismo e Comercio como xefe provincial de Telecomunicacións en Ourense.

No seu labor de humorista gráfico, publica dende hai 25 anos en La Región de Ourense e Atlántico Diario de Vigo con viñetas do personaxe O Carrabouxo, que é tamén o seudónimo do autor. Publica ademais, entre outros, no semanario A Nosa Terra e na revista Tempos Novos. O personaxe foi levado á animación por Lhosca Arias.

Entre os seus libros de humor gráfico cóntanse: Ano e pico de Carrabouxos, 20 anos de Carrabouxo (Deputación de Ourense), Novos chistes de Xosé Lois (A Nosa Terra) ou Humor gráfico. Xosé Lois na transición (Universidade de Vigo).

O CARRABOUXO vs. LIÑA EDITORIAL DO XORNAL
"Hai unha distancia enorme entre a liña ideolóxica do xornal e a miña e, non obstante, convivimos sen contradicirnos ningún dos dous. Si existen moitas censuras, moitas tensións e discusións. Déronse situacións extremas, coma o xornal e máis eu defendendo posturas totalmente distintas", afirma Xosé Lois.
A popularidade da personaxe é seguramente a clave de que teña sobrevivido nas páxinas de La Región ao longo de tantos anos. "Seguramente sexa a difusión que lles proporciona, e que parece que é bastante importante, aínda que eles non o recoñezan para non pagarme máis. Supón tamén un certo morbo e unha fiestra cara certos sectores que se cadra non lerían o xornal se non fose polo Carrabouxo", apunta divertido.

CARACTERÍSTICAS DA OBRA
Ao longo de 25 anos, Xosé Lois permanece fiel ao Carrabouxo. Personaxe espigado, con boina calada tapando os ollos e cigarro sempre na boca, reflexiona con certa distancia sobre acontecementos da vida cotiá. Cunha perspectiva nacionalista e crítica, desborda retranca, e existe en si mesmo grazas aos seus pensamentos. O texto é fundamental nas viñetas de Xosé Lois.
Os escenarios repítense con certa frecuencia: a barra do bar, algunha mesa… aínda que o máis habitual á velo ao aire libre, sentado nunha pedra, un muro ou un banco. Normalmente está acompañado por algún outro personaxe, aínda que o peso da acción recae sobre o protagonista.
Os temas refírense fundamentalmente ao ámbito local (Ourense) e autonómico aínda que hai referencias á cuestións de carácter estatal.